top_leaderboard
Thursday, May 6E-mail: info@isonganews.com | Tel: 0783412401

Covid-19: Aba mbere muri US baratangira gukingirwa ku wa mbere

Ku wa mbere abaturage b’Amerika baratangira guhabwa urukingo Pfizer/BioNTech rwa coronavirus nyuma yuko byemejwe ko rukoreshwa by’amaburakindi, nkuko abategetsi babivuga.

Doze (doses) za mbere zigera kuri miliyoni eshatu z’urwo rukingo zirakwirakwizwa “muri leta zose” muri iyi mpera y’icyumweru, nkuko byavuzwe na Jenerali Gustave Perna, urimo kugenzura ibikorwa byo gukwirakwiza urwo rukingo.

Urwo rukingo rurinda kwandura Covid-19 ku kigero cya 95%, ndetse ikigo cy’Amerika kigenzura ubuziranenge bw’ibiribwa n’imiti (FDA) cyemeje ko nta bibazo ruteza ku buzima.

Ku wa gatandatu, muri Amerika hapfuye abantu 3,309 bazize Covid-19.

Uwo mubare w’abapfuye kuri uwo munsi, watangajwe na Kaminuza ya Johns Hopkins yo muri Amerika, ni wo wa mbere munini cyane ku isi w’abishwe na Covid-19 ku munsi umwe.

Kuva mu kwezi kwa cumi na kumwe, umubare w’abicwa na coronavirus wakomeje kwiyongera cyane muri Amerika.

Ubwo ku wa gatanu ikigo FDA cyemezaga ko urukingo Pfizer/BioNTech rukoreshwa, cyari kimaze kotswa igitutu n’ubutegetsi bwa Trump ngo kirwemeze.

Cyavuze ko iyemezwa ry’urwo rukingo ari “intambwe ikomeye” itewe mu guhangana n’iki cyorezo.

Mu kiganiro n’abanyamakuru ku wa gatandatu, Jenerali Perna – wavugiraga itsinda rya leta y’Amerika rishinzwe igikorwa cy’ikingira kizwi nka Operation Warp Speed – yavuze ko doze z’urwo rukingo zishyirwa muri za kontineri zigatwarwa “mu masaha 24 ari imbere”.

Yagize ati: “Mwitege ko ku wa mbere ahantu 145 muri za leta hazaba hagejejwe urukingo, ahandi hantu 425 rukahagera ku wa kabiri, naho ahanyuma 66 rukahagera ku wa gatatu”.

Yongeyeho ko iryo kwirakwizwa ry’urukingo Pfizer/BioNTech rwa coronavirus ryo mu cyumweru gitaha, rizahaza icyiciro cya mbere cy’abakingirwa bagera hafi kuri miliyoni eshatu.

Jenerali Perna yabwiye abanyamakuru ko “yizeye 100%” ko doze “zicyenewe mu gutsinda umwanzi Covid” zizatwarwa mu mutekano.

Ariko, yaburiye ko nubwo iki cyumweru cyabayemo gutera intambwe mu guhangana na Covid-19, “ntabwo turarangiza akazi mu gihe cyose Umunyamerika wese ataragezwaho urukingo”.

Leave a Reply

Your email address will not be published. Required fields are marked *